ژیانکو، بونلارا فکرلشرکن، زندان اوتاغینین روحسوز قارا کاشی‌لارینا گؤز تیکمیشدی. بئش-آلتی آیدا باشینا گلن‌لری ذهنین‌دن کئچیردی. نئچه آی بوْیونجا، بیر قهرمان‌دان اخلاقسیز جنایتکارا چئوریلمیش‌دی. باشینا گلدیگینی هله‌ده اینانمیردی. اوستادلیغی‌نی الین‌دن آلیب دانشگاه دان ائشیگه اوتورموشدولر. ایکی امبریولوژیست (embryologist) امکداشی‌نی‌دا محبوس ائتمیش‌لر. اۆسته‌لیک، مجوزسیز طبابت یاپدیغینا گؤره 560 مین دلار جزا و 3 ایل زندان وئرمیش‌لر. اونون جرمی نَدی؟ فکیرلشیردی کی "من یالنیز او ایکی اوشاغا حیات وئرمک ایستیردیم . یالنیز اونلاری ایدزدن ایستیردیم قورتارام... کئشکه هئچ اول باشدان بو یولا گیرمزدیم... کئشکه او قورباغا یولوما چیخمازدی..."

ژیانکونین جرمی انسانین ژنلرینه ال آپارماغیدی. ژیانکو 2018ده، بیولوژی کنفرانس‌لارین بیرینده انسان جنین‌ینین، ژنلرینی دئییشمک تکینیک‌نه ال چاتدیغینی دونیایا بیلدیرمیشدی. ایلک دفعه اولاراق آزمایشگاه‌دا، اینسان جنینین نطفه‌سینی ایدزدن قورتاریب و ساغلام* نطفه‌نی آنانین بطن‌ینه انتقال وئرمه‌گی باشارمیش‌دی. بو نطفه دن "لولو و نانا (Lulu and Nana)" آدلی ایکی قیز اوشاغی دنیایا گلمیش‌دی. هله ماراقلی‌سی* بودور کی آزمایشه سئچیلمیش ار-آرواد کیشی‌نین ایدزی اولدوغونا گؤره اولاد صاحبی أولا بیلمزدیلر. اۆسته‌لیک* بو قیزلارین ژنلریند‌کی ایدزه قارشی* مقاومت اونلارین گلن نسل‌لرینه‌ده کئچجک‌دی... بو خبر بوتون ژنتیک بیلگین‌لری‌نین آراسیندا پاتلادی. اونلارین بو خبره تپگی‌سی* اینانمازلیق و آجیق‌لا قاریشمیش‌دی. او قوللاندیغی* تکنولوژی (CRISPR-CAS9)، 30-40 ایلدی تانینمیش‌دی آنجاق بو تکنولوژی‌نین عوارضی و ماهیتی تمامیله بللی اولمادیغینا گؤره بیر چوخ دونیانین بیلگینلری آندلاشیپلار کی هله هله اونو اینسان‌لارا قوللانمایالار. مثلا، ژن‌لرین دییشمه‌‌سینین تاثیری گلن‌کی نسل‌لره نه اولدوغو بللی دئییل، نیه کی ژنتیک او قدر پیچیده ‌دیر کی بللی دئییل مختلف محیط‌لر ژنلری نئجه ائتکی‌له‌یه‌جک*. مثلا بللی دئییل کی باشقا محیط‌ده بو ژنلر یالنیز ایدزین قاباغین آلاجاقلار یوخسا گؤزله‌نیلمز عوارضی اولاجاق (مثلا بلکه انسان‌دا اوچونجو بیر قول بیتدی). دولت لرین نئچه بو تکنولوژی‌دن قوللانمالاری‌نی نئجه بیلمک اولار؟‌ بلکه سربازلارین ژنلرین دئییشیب سوپر-سرباز دۆزلدجکلر. بیلمک اولماز.

سؤزلوک: یاشیل: سبز - چؤهرایی: صورتی – ساغلام: سالم – ماراق‌لی: ایلگینج، جالب – اۆسته‌لیک: همیده، بعلاوه – قارشی: علیه – تپگی: عکس العمل، واکنش- قوللانماق: استفاده ائتمک – ائتکی‌لمک: تاثیر بوراخماق