1- اؤلکه‌ده یاشایان فرانسه و انگلیسجه دانیشان وطنداشلارین اوْرانی همیشه ثابیت قالاجاق

2- بو ایالتین مهاجرت سیستمی مرکزی حکومت‌دن مستقل اولاجاق

3- کانادانین باشقا ایلات‌لرینده یاشایان فرانسه‌لی‌لرده رسمی اولاراق تانیناجاق و هر بیرینه فرق‌لی بیر بایراق تانیملاناجاق

4- کئبئک ایالتینین دولت بودجه‌سیندکی سهمی چوخالاجاق

5- دولتی ایشلرینده چالیشان‌لار هر ایکی دیلی بیلمه‌لی اولاجاق‌لار (حتی نخست وزیر و وزیرلری)

6- کئبئک ایالتی‌نین، مجلیس‌ده گئچن هرهانسی بیر قانونا "وئتو" حقی اولاجاق

7- مجلس صندل‌لرینین بیر چوخو، ثابت اولاراق کئبئک ایالتینه وئریلجک

بو امتیازلار نتیجه‌سینده ملت‌ین 50.5% کانادانین بیر پارچاسی قالماغی سئچدی.

ایندیکی دوروم:

بؤگون مونترال کانادانین ایکینجی شهری قالسادا، بیرینجی اولماق اوچون تورونتو ایله یاریشیر*. گئچن ایللرده، مونترال شهرینی کانادانین یاپای زکا* مرکزی اولماسی‌نی پلانلاییر. اجتماعی و کۆلتورل باخیمدان، کئبئک میللتینین دیلی فرانسه‌جه اولدوغو اوچون، فرانسه اولکه‌سینه و اورانین کولتورونه چوخ اونم وئریرلر. بئله کی مونترال و کئبئک‌سیتی شهرلری آمریکادا "اروپایی" شهرلر تانینیرلار. کئبئک‌ده ان گؤزل فرانسه رستورانلاری، فرانسه قهوه‌سی و کافه‌لری، فرانسه کروسانی (بیر جور تی‌تاپ 😊 ) و بیر چوخ فرانسه ایله باغلی اولان شی تاپییر. حتی بو مساله معماری‌ده ده گؤرونور. مثلا تورونتو شهری‌نین معماری‌سی، آمریکانین دیگر شهرلری کیمی‌دیر. لکن، مونترالین معماری‌سی، آمریکا و اروپا معماری‌سی‌نین قاریشیمی‌دی. حتی کئبئک ایالتینین ایکینجی شهری اولان کئبئک‌سیتی، تماما بیر اروپا شهری کیمی‌دیر.

دیل باخیمیندان، مونترال، ایالتین ان‌بویوک شهری اولدوغو اوچون، و قدیم‌دن انگلیس‌لر بورادا یاشادیغی اوچون، میللتین چوخو هم انگلیسجه و هم فرانسه‌جه دانیشیر (40% سادجه فرانسه جه دانیشیر، 50% هر ایکی دیل، 7% یالنیز انگلیسجه دانیشیر، و 3% باشقا دیللر). آمما باشقا یئرلرده ایلک اولاراق هامی فرانسه‌جه دانیشیر. آنجاق، کئبئک ایلاتی، فرانسه دیلینی قوروماق اوچون الیندن گلنی اسیرگه‌میر*. فرانسه‌جه باشاران‌لارا اؤزل* ایمتیازلار وئریر. مثلا بو دیلی بیلمه‌ین‌لر یئنی گلن مهاجرلره کیلاس قویور و هر قاتیلانا 25 دلار وئریر (دوشونون هم دیل اورگنیرسیز، هم پول آلیرسیز).

نتیجه ده، بیر مدت بورادا یاشاییب کئبئک‌لی‌لرله دانیشدیقدان سونرا، بورانین میللتی‌له بیزیم میللتین نه قدر بنزر اولدوغونو گؤردوم. هم اینسانلاری، هم شهرین معماری‌سی منی هر گؤن تبریزی یادیما سالیر.

سؤزلوک: سوْنوج: نتیجه – نَدَن: علت، دلیل – یاریشماق: مسابقه وئرمک – یاپای زکا: Artificial İntelligence – اسیرگه‌مک: دریغ ائتمک – اؤزل: مخصوص –

عکس: مونترال‌دان گؤرونتولر

@YengiDunyadan|یئنگی دنیادان آذربایجانا سوْوقات