Embedded Files
ناغیلی بو کیتاب دا گوروپ بوردا گتیرمیشم. آنادیلی، آلتی ایللیک ابتدایی مدرسه لر اوچون، آقای محمدرضا باغبان کریمی.
بیري وارمیش، بیري یوخموش، بیر کئچی وارمیش. کئچینین اوچ بالاسی وارمیش. بیرينین آدي شنگولوم، بیرينین آدي شونگولوم، او بیرينین ده آدي منگولوم.
بو کئچی هر گون گئدیب مئشهده و چؤلده اوتلایار، گئري قاییداندا بوینوزوندا اوت، آغزیندا سو، دؤشلرینده سود گتیررمیش. آستانادا دایانیب قاپینی دؤیرمیش، شنگولوم، شونگولوم، منگولوم آتیلا-آتیلا، دینگیلده یه-دینگیلده یه قاپینین دالینا گلیب سوروشارمیش.
- کیمدیر؟
کئچی ده جاواب وئررمیش:
- شنگولوم، شونگولوم، منگولوم!
آچین قاپینی، من گلیم!
آغزیمدا سو گتیرمیشم، دؤشومده سود گتیرمیشم، بوینوموزدا اوت گتیرمیشم.
شنگولوم، شونگولوم، منگولوم سئوینیب تئز قاپینی آچارمیش. کئچی ایچري گیریب اونلارین اوتونو، سویونو وئررمیش. یئدیردر، ایچیردر، یاتیردارمیش. صاباح اؤروشه گئدنده یئنه ده هر گون اوچونون اوزوندن اؤپوب تاپشیرارمیش، شنگولوم، شونگولوم، منگولوم، قورد سیزي آلدادار، آپارار یئیر، ها. هر کیم قاپینی دؤیدو، من دئین سؤزلري ائشیدمهمیش آچمایین.
گونلرین بیر گونو قورد اؤزونه سؤز وئردي کی، شنگولوم، شونگولوم، منگولومو یئیه جگم. کئچینین قاپیسینین آغزینا گلدي. یاواش- یاواش قاپینی دؤیمه یه باشلادي. شنگولوم، شونگولوم، منگولوم دینگیلده یه-دینگیلده یه قاپینین دالینا گلیب سسلندیلر:
- کیمدیر؟
قورد دئدي:
- منم، کئچییم، بالالاریم، آچین قاپینی.
شنگولوم، شونگولوم، منگولوم او ساعات بیلیرلر کی، قاپینی دؤین آنالاري دئییل، قورددور، اونلارا کلک گلیر.
قورد نه قدر یالواردي، قاپینی آچمادیلار. قورد قاپینی سیندیرماق ایسته ییردي، بیر ده گؤردو کی، کئچی گلیر. قاچیب بیر کولون دالینا گیردي. اوردا گیزلندي کی، گؤرسون کئچی قاپینی نئجه آچیر. او، بیري طرفدن کئچی گلیب قاپینی دؤیه-دؤیه دئدي:
- شنگولوم، شونگولوم، منگولوم!
آچین قاپینی، من گلیم!
آغزیمدا سو گتیرمیشم، دؤشومده سود گتیرمیشم، بوینوموزدا اوت گتیرمیشم.
شنگولوم، شونگولوم، منگولوم اوینایا-اوینایا گلیب قاپینی آچدیلار. کئچی ایچري گیردي. همیشه کی کیمی اونلارا سو، اوت، سود وئردي. بیر آز اوردان-بوردان صؤحبت ائله دیلر. بالالاري قاپینی دؤیولدویونو سؤیله دیلر. کئچی دئدي:
- او خاین قورددور. سونرا بالالارین اوزوندن اؤپوب گئتدي.
ایندي سیزه خبر وئریم قورددان. کئچینین سؤزلرینی قورد اؤیرنمیشدي. کولدان چیخیب بیر آز گؤزله دي.
سونرا یاواش-یاواش گئدیب قاپینی دؤیمه یه باشلادي. چپیشلر اوینایا-اوینایا قاپینین دالینا گلیب سوروشدولار:
- کیمدیر؟
قورد سسینی کئچینین سسینه اوخشادیب دئدي:
- شنگولوم، شونگولوم، منگولوم !
آچین قاپینی، من گلیم!
آغزیمدا سو گتیرمیشم، دؤشومده سود گتیرمیشم، بوینوموزدا اوت گتیرمیشم.
بالالاري ائله بیلیر کی، بونلاري چاغیران آنالاریدیر. جلد قاپینی آچدیلار. قورد او ساعات منگولومو یئدي،
شنگولوم، شونگولوم قاچیب گیزلندیلر. قورد چوخ آختاردي، اونلاري تاپمادي. کئچینین قورخوسوندان قاچیب گئتدي.
ائله کی، قورد گئتدي، شنگولوم، شونگولوم گیزلندیکلري یئردن چیخیب قاپینی باغلادیلار. بیر کونجه اوتوروب آغلاماغا باشلادیلار. آخشام دوشدو. کئچی اؤروشدن قاییدیب قاپینی نه قدر دؤیدو، اونا جاواب وئرن اولمادي. چپیشلر ائله بیلدیلر کی، یئنه ده قورددور. اونا گؤره جاواب وئرمه دیلر. کئچی گئري چکیلیب قاپییا بیر بوینوز ایلیشدیردي. دالبادال بیر بوینوز، ایکی بوینوز شنگولومله شونگولوم گؤردو کی، قاپینی سیندیراجاق، گلیب قولاق وئردیلر، بالاجا دئشیکدن باخدیلار کی، آنالاریدیر. قاپینی آچدیلار. کئچی اونلاردان سوروشدو:
- بس، منگولوم هانی؟
اونلار باشلادیلار آغلاماغا. احوالاتی آنالارینا دانیشدیلار. کئچی حیرصله نیب دئدي:
- یاخشی، قوردلا منیمکی قالسین، سیز قاپینی باغلایین، ائوده اوتورون.
بلی، کئچی دوشدو یولون آغزینا. آز گئتدي، چوخ گئتدي، گلیب بیر دامین اوستونه چیخدي. آیاقلارینی یئره دؤیمهیه باشلادي. ایچریدن سس گلدي:
- او کیمدي، دامین اوسته، تاپپیر-توپپور دؤیور، آیاغین دامین اوسته.
کئچی دئدي:
- بالامی سن یئمیسن؟
تولکو دئدي: - یوخ، من یئمهمیشم، گئت قورددان سوروش.
کئچی اوردان دمیرچینین یانینا گلیب دئدي:
- دمیرچی قارداش، منیم بوینوزلاریمی قیلینج کیمی ایتی ائله، نیزه کیمی شیش.
سنه بیر کاسا قایماق، بیرکاسا دا سود وئره جه یم.
دمیرچی راضی اولدو. بیر آزدان کئچینین بوینوزلاري قیلینجدان دا ایتی اولدو. کئچی اونون قایماغینی، سودونو وئردي. کئچی گئتدي چیخدي قوردون دامینین اوستونه. بو واخت قورد دا بیر قازان آش آسمیشدي، اوجاغین اوسته بیشیریردي. کئچی دامی دؤینده بونون آشینین ایچینه تورپاق تؤکولدو. اوندا قورد چاغیردي:
- او کیمدیر دامیم اوسته، توز تؤکر شامیم اوسته؟
آشیمی شور ائیله دي، گؤزومو کور ائیله دي؟
کئچی جاواب وئردي:
- منم، منم، جاناوار بوینوزوم قوشا-قوشا.
بالامی سن یئمیسن گل گیرك بیر ساواشا.
قورد جاواب وئردي:
- چوخ گؤزل، گل ساواشا، ائله من سنی آختاریردیم.
قورد سؤزونو تامام ائله دي. دیشلرینی قیچیرتدي، ایسته دي کئچینی یئسین. کئچی اونا آمان وئرمهدي. گئري چکیلیب ایره لی گلدي، اونا ائله بیر بوینوز ووردو کی، بوینوزلار ایکی قاریش اونون دؤشونه ایشله دي. قورد برکدن اولاییب یئره ییخیلدي. کئچی او ساعات اونون قارنینی ییرتیب منگولومو چیخارتدي، باغرینا باسدي، گؤزلریندن اؤپدو. قورد قیشقیریب دئدي:
- واي قارنیم، واي.
کئچی دئدي:
- منگولومو یئمه ییدین!
واي قورساغیم دئمه ییدین!
خاین قورد اؤلدو. کئچی بالاسی منگولومو گؤتوروب ائوه یوللاندي. شنگولوم، شونگولوم منگولومو گؤرنده چوخ سئویندیلر. اونون اوزوندن-گؤزوندن اؤپدولر، شادلیق ائله دیلر.
گؤیدن اوچ آلما دوشدو، بیري ناغیل دئیه نین، بیري قولاق آسانین، بیري ده منیم.
[محمدرضا باغبان کریمی، آنا دیلی، آلتی ایللیک ابتدایی مدرسه لر اوچون، انتشارات نیکان کتاب، زنجان ۱۳۹۵]
Page updated
Google Sites
Report abuse