شعر ۱۰۰) اولدوزجوک

آقای ابوطالب نصیری (پیریکلی آرتان) نان بیر گوزل شعر. شعرین متنین ایشیق سایتین نان گوتورموشم. عزیز شاعیریمیز بو شعری، معروف انگلیسجه شعرینین twinkle twinkle little star وزنین ده و ریتمین ده شعره چکیب. بو شعر ان مشهور اوشاقلار اوچون شعرلرین بیریدیر. ساده جه یوتیوب دا اونون ویدیوسی ۱ میلیارد، ۸۰۰ ملیون کلیک یئییب. بیلمیسیز نه قدر سئویندیم گوردوم پیریکلی آرتان بو شعری نه لطافتینن و نه اوره گه یاتیم چئویریبلر. هر دیل ده بو شعر واریدی انگلیسی، فرانسه، آلمانی، عربجه، تکجه بیزیم بالالاریمیز محروم قالمیشدی. یاشا سنی پیریکلی آرتان...

اولدوزجوق پارلا پارلا

تاپیلمامیش تاپماجا

سن دونیانین دامیندا

آلماس‌سان گؤی جامیندا

ایشیقلی گون باتاندا

داغ دالیندا یاتاندا

اویان آچ سن گؤزونو

پاریلدات آغ اوزونو

گئجه‌نین یولچولاری

باخیرلار سنه ساری

تاپیرلار دوز یوللارین

سن پارلا نارین نارین

أن یئر اوزونه دام‌دان

گل بویلان آلوشقامدان

«بیده بیده» اوینایاق

أل ألده، آیاق قویاق

بیز گؤیلرین اوزونه

دونیالارین دوزونه

دونیامیزدان سوووشاق

دونیالارا قوووشاق

هر گئجه تَزه دونیا

گؤزوم گؤره تانییا

گئدَم ایشیغا ساری

تاپام تاپماجالاری

آپارات دا دا بیر ایفاسین پایلاشیبلار حتما گئدیب دینله یین.

https://www.aparat.com/v/AjcLZ/شعر_کودکانه_ترکی_اولدوزجوق_چشمک_بزن_ستاره_twinkle_twinkle

https://ishiq.net/seir/20666/اولدوزجوق-پارلا-پارلا-پیریکلی-آرتان.html