ناغیل ۱۵) قارا بولود ایله یئل

ناغیلی خانم زینت تدین یازیب لار. مهد تمدن روزنامه سین ده و آسا خبر وئبسایتین دا اونون متنی واردیر.

بیر گون قارا بولود فیکیرلشیب، اؤز- اؤزونه دئدی: آی آللاه! بو یئکه‌لیکده گؤیده تکجه منیم آنام یوخ‌دور. آنام اولسایدی من ده تک قالمازدیم. الیم آنامین الینده اؤلکه‌لری گؤرمه‌یه گئدردیم. دئیردیم، گولردیم، آغلایاندا دا، آنام‌لا آغلایاردیم.

قارا بولود بو فیکیرده ایدی کی، تصمیم توتدو تک باشینا یولا دوشوب، هر نه تَهَر ده اولسا آناسینی گزیب تاپسین.

او، تازا یولا دوشموشدو کی، بیر اووولتو سسی گلدی. جانینا لرزه دوشدو.

-دایان قارا بولود! دایان قارا بولود! سن سن کؤرپه‌سن. بو یولا گئتمک سنین اوچون چتین‌دیر!

قارا بولود او ال- بو اله گؤز گزدیردی. هئچ نه گؤرمه‌دی. اؤز-اؤزونه دئدی: باشیما هاوا گلیب گؤره سن می؟!

نه ایسه، قارا بولود یولونا دوام ائتمک ایسته‌دی. یئنه او سسی ائشیتدی. دایانیب سوروشدو:

– سن کیمسن؟ نیه گؤزه گؤروشمورسن. اولمویا مندن قورخورسان؟

گئنه من… من… دئمه‌سینی باشلامیشدی، یئل دئدی:

-آمان سنین بو یئکه- یئکه دانیشماقلاریندان! سنین آنان چوخ یاخشی بیر بولود ایدی، سن کیمه چکمیسن آخی؟! ائله اخلاغین بئله‌دیر کی، دوست‌لارین سنی تک بوراخیبلار، یوخسا بولودلارا بیر چتین‌لیک گلسه، هامیسی ال بیر اولوب اونو حل ائدرلر. آنجاق آنان سنی منه تاپشیریب، سن هارا گئتسن، من ده سنینله گله‌جه‌یم.

قارا بولود گولدو:

-هاهاهاها!… سن؟… منه؟… سن منه کمک ائده‌جکسن؟! هله سن اؤزونو دولاندیرا بیلمیرسن. مندن او قدر قورخموسان کی، گؤزومه گؤرونموسن.

یئل یئنه صبر ائله‌دی. اما بولود ویررا ویرر دئییردی. یئل دئدی:

-آی قیز! قورتاریرسان می یا یوخ؟

بولود دئدی:

-قورتارماسام نه اولار؟

یئل دئدی:

-سن او قدر باشی سویوقسان کی، منی گؤرمورسن.

بولود دئدی: -من می؟ لاپ دا هوشوم باشیمدادیر. سن مندن قورخورسان، اوی کی گیزلنمیسن.

یئل قاهقاهلایا گولوب دئدی:

-سن مندن قورخدون یا من؟ سسیمی اشیتمک همان جانیوا لرزه دوشدو.

دارتیشمالاری چوخالمیشدی. یئل بتر حیرص لندی. بیر دانا یاواشجادان پوفله دی. قارا بولود نئچه متیر آتیلدی. یئنه لرزه دوشدو جانینا. دیلی توتار توتماز دئدی:

-یئ…یئ…یئ… للل، نه ایش گؤروسن؟!

اوتقوندو، سونرا دئدی:

-منیمله دؤیوشمک قصدین وار؟ جرات‌ین وار گل اوز- اوزه دؤیوشک با!

یئل دیل‌لندی:

-من سنین آرخاندایام. هئچ ده قورخوم یوخ‌دور. بیر دیقه دیل قفسه سالسان دئییرم هارایا آپاریرام سنی.

بولود اؤزونو سیندیرماق ایسته‌میردی. دئدی:

-سئویردیم بو سفره تک گئدم. دونیانن گؤزل‌لیک‌لرینی گؤره-گؤره آنامی دا تاپام.آمما سنین ال چکن گونون یوخ‌دور. چاره‌سیزلیقدان قبول ائتمه‌لی‌یم کی، سنینله یول‌بیر اولام.

بونو دئییب، یئل‌دن ایسته‌دی اؤزونو گؤسترسین. یئل دئدی:

آی ساچی قارا، گؤزو قارا

نه‌دن گزیرسن آوارا

سنی چاتدیرارام آناوا

قالیب یالوارا- یالوارا

اوخشایار قارا ساچیوا

قارا گؤز، قارا قاشیوا

تک سفره گئتمه بولود

یاراشمیر چیچیک یاشیوا

سن آغلاسان آنان یانار

دونیانی بیر قفس سانار

چاتسا آنا بالاسینا

قارا دونیانی آغ قانار

بولود بو سسی ائشیدینجه، اونو آناسی‌نین لایلاسینا اوخشاتدی. بیردن دایاندی. گئرییه قاییتدی، بئله دئدی:

سن آغ یئل‌سن، یا قارا یئل

تؤکورسن بئله شیرین دیل

اوخشاییر آنامین دیلینه

ائله بیل اوخویور بولبول

دارتیشمایاق،گل باریشاق

ال بیر اولاق،بیز قاریشاق

گولک بولودسوز گؤی‌لرده

گولسوز چمنه یاراشاق

خلاصه بولودخانم راضی دوشدو. مطمئن اولدو کی یئلین، آناسیندان خبری وار. یئل دئدی:

-حاضیر اول.

بولود حاضیرلاشینجا، یئل نفسینی چکدی ایچری‌یه. بولود دئمک همان من حاضیرام، یئل نفسینی وئردی ائشییه. بولودون جانی تیتره‌یه‌رک، یئریندن نئچه متیر آتیلدی.آتیلدیدی، آتیلدی… آز آتیلدی، چوخ آتیلدی، بیردن بیر بولودون قوجاغینا دوشدو. ائله دینج بیر قوجاق ایدی کی، ایستی‌سیندن آنا قوجاغی اولدوغونو سئچمک اولوردو. آناسی یئلی گؤرمک همان باشا دوشدو کؤرپه بولود اؤز بالاسی‌دیر. بالاسینی باسدی باغرینا، آنا- بالا آغلاشدیلار. آز قالمیشدی یئری گؤیو سئل آپارسین کی، یئل بیردن اسدی، بو ننه بالانی بیری- بیریندن بیر آز اوزاقلاشدیردی.

کؤرپه بولود آناسینی گؤروب اورک‌لنمیشدی. گئنه باشلامیشدی من… من… دئمه‌یه. آناسی اونون سؤزونو کسیب، دئدی:

-منیم دادلی، دوزلو ناز قیزیم! هامی‌نین یاشاییشیندا یولداش‌دان اؤنملی بیر زاد بیر ده یولداش‌دیر. اما نه هر یولداش. بونا گؤره ده لازم‌دیر اؤزونه بیر نئچه دوست تاپاسان. دوست‌لاریوین دا قدرینی بیله‌سن. سنی بوراخمامیشدیم. ایسته‌میشدیم بو سؤزو باشا دوشه‌سن. یئله تاپشیرمیشام سنی تازا دوست‌لارلا تانیش ائله‌سین. اونلارین تجربه‌لرینی ایشه توت. تک قالما. اؤزوندن بؤیوک‌لرله دانیشیغینی دا گرک کی اؤیرنه‌سن.

سونرا بولودون آناسی یئلی سس‌لدی. یئنه بولودو یئله تاپشیردی. بیرلیک‌ده یولا دوشدولر. گئتدیلر کی تازا بیر اؤلکه‌نین گؤیونده اولان تازا دوست‌لارلا تانیش اولسون، هر دن ده آناسی‌نین گؤرمه‌یینه گلسین.

آز گئتدی، چوخ گئتدی، آنجاق بیر گؤزل، ماوی سمایا یئتیشدیلر. یئل دئدی:

-بو دا سنه دئدیییم تمیز سما، گئت دوست‌لاریوا سالام وئر و اونلارلا تانیش اول. من ده گئدیرم ایش‌لریمه یئتیشم.

یئل بیر بالاجا پوفله‌دی. بولود یولداش‌لاری‌نین کناریندا آرام تاپدی.

گؤیدن اوچ آلما دوشدو، بیری منه قالمادی!

[زینت تدین، قارا بولود ایله یئل، مهد تمدن روزنامه سی، ۱۳۲۲ شماره سی، ۸ جی ایل،۱۳ اردیبهشت ۱۴۰۰]