#اسکار #تگزاس

#Oscar #Texas

هیوستون حیوانچیلیق فئستیوالی

بو فئستیوال "هیوستون روْدیو (Rodeo Houston)" آدیلا تانینیر و دنیانین ان‌ بؤیوک حیوانچیلیق* گؤستری‌سی‌دیر* کی هر ایل فوریه‌نین 28دن مارچ‌ین 20سینه دک هیوستون‌دا گئچیریلیر. بو فئستیوال‌دا چئشیدلی نژاد‌لاردان مال، داوار، تویوق، دووشان و تارلالاردا* بئجریلیلن سایر حیوان‌لاری یاریشماغا* چیخاردیرلار. بو آرادا بیزوْو و دۆوه(düvə )* رقابتلری ان طرفدارلی بؤلوملردندی. بو روْدیودا اَن آزی 1000 بیزوْو، جؤنگه* (cöngə)، و دۆوه نمایشه گتیریلیر. تمیزلیک، کؤکلوک، بوْی و حیوانین مهارتلی داورانماسی رقابتی قازانماق شرطلریندن. ایکی رقابت داها چوخ ماراقلی‌دی*:

- 18-13 یاشلی یئنی یئتمه*‌ اوغلان و قیزلار اینَگی دولاندیریب و بللی بیر یئرده ساخلامالیدیرلار. اونلار بیر اَل ایله نوخدادان یاپیشیب و باشقا اَل‌له بیر چوبوق* ساخلامالیدیر. بو چوبوق حیوانی دؤیمک اوچون یوخ، بلکه اونو دوردوروب تومارلاماق اۆچوندور.

- "قویون قاچدی (Mutton Bustin’)" کی ۶ یاشلی اوشاق‌لار آراسیندا گئچیریلر. بو رقابتده اوشاقلار قویونا مینیب و قویون قاچارکن یئره دۆشمه‌مه‌گه چالیشمالیدیرلار.

تاماشایا گئدن خالق، حیوان صاحبیندن اذن آلیب حیوانی تومارلاییب عکس چکه بیلرلر. بو فئستیوال هم کندلی حیوانچیلاری هیجانا گتیریر، همیده شهرلیلر، اؤزللیکله* اوشاقلار، بو حیوانلارلا یاخیندان تانیش اولوب ماراقلانیرلار.

سؤزلوک: حیوانچیلیق: دامپروری – گؤستری: show، نمایشگاه – تارلا: مزرعه – یاریشما: مسابقه، رقابت – دۆوه: 1-2 ایللیک اینک – جؤنگه: ارکک اینک بالاسی - ماراقلی: جالب – یئنی یئتمه: نوجوان – چوبوق: دۆز آغاج، stick – اؤزللیکله: مخصوصا

عکس و ویدئو: بو اولای‌دان چکدیگیم عکس/ویدئو

@YengiDunyadan|یئنگی دنیادان آذربایجانا سوْوقات