میرزا علی اکبر صابر (۱۸۶۲-۱۹۱۱) دن بیر شعر.
جۆتچۆ
چیخدی گۆنش، دولدۇ جهان نور ایله،
جۆتچۆ سۆرۆر، تارلادا جۆت شۇر ایله.
آتلار، اؤکوزلر کوْتانا گۆج وئریر،
گاه یۆرۆیۆر، گاه ییخیلیر، گاه دۇرۇر.
جۆتچۆ باتیر قان-تره یئر شۇملاییر
شۇملادیغی تارلالاری تۇملاییر.
اولسا دا آرتیق نه قَدَر زحمتی،
ایشلهمگه وار او قدر غیرتی،
چۆنکی بیلیر راحت اذیّتده دیر،
شاد یاشاماق سعی ده، غیرت ده دیر،
ایندی اگرچی اونا زحمت اولار،
قیشدا عیالی، اؤزۆ راحت بۇلار.
جمع ائده جک تارلاسینین حاصلین،
بسله یَجک عائله سین، هم ائلین.
[قارا نامازوف، تیمور احمدوف، آذربایجان اوشاق ادبیاتی آنتولوژیاسی، ایکیمینجی جیلد، اؤندر نشریاتی، باکی ۲۰۰۴، ص۱۳]