شعر ۸۸) آغاجلارین بحثی

آلما، پالید، شام آغاجی حال ایله

ائیلدیلر بحث بۇ مینوال ایله

باشلادی تعریفه پالید قامتین

اؤیدۆ اؤزۆن، زوربالیغین، حالتین

یئتمز اوْلۇر، سؤیلدی، داغلار منه

لاییق اوْلۇر فخر ائده باغلار منه

آز قالا باشیم یئتیشیر گؤیلره

شاخ بوداغیم کولگه سالیب هر یئره

اسسه کۆلک، قوْپسا دا طوفان، یئنه

اَیمه یه اصلا گۆجۆ چاتماز منه

جانلیجادیر، زورباجادیر بالدیریم

سیندیرا بیلمز منی هئچ ایلدیریم

آلما آغاجی اوْنا وئردی جواب

ائیله مه تعریف اؤزۆنۆ، ای جناب

زوربادی هرچند کی، قددین سنین

یوخ منه تای اولماغا حددین سنین

سنده بیتر نئچه وجسیز قوْزا

آنجاق دا قیسمت اولار دونقوزا

منده ولی، یاخشی، گؤزل آلما وار

رنگینی هر کیم گؤره حیران قالار

دادلی لطافت لی، ملاحتلیدیر

ساپلاغی اینجه، اؤزۆ لذذتلیدیر

شام آغاجی بیلدی بو کیفیتی

سویلدی: بسدیر، بوراخین صحبتی

بوش دانیشیقدان نه چیخار، آی بالام

قیش گۆنۆ سیز چیلپاق اوْلۇرسوز تمام

لئیک منیم قیشدا دَخی یاز کیمی

یاشیل اوْلۇر پالتاریم اطلس کیمی

لازیمم ائو تیکدیرن اینسانلارا

هم دیره یَم، هم قاپی ائیوانلارا

قیش سوْبادا خلق منی یاندیرار

منفعتیم خلقه منیم چوخ دَیَر

میرزه علی اکبر صابیر