Embedded Files
شعر خانم سحر خیاوی دن دی. مهد تمدن روزنامه سین ده چاپ اولونوپ.
پیشیک خانیمین خطاسی!
پیشیک خانیم بو گونلر
باخماییب آغ- بوزونا
کورونا گون‌لرینده
توی توتموشدو قیزینا.
گؤتورولوب ماسکالار
یئییلیردی شیرنی‌لر
یاییلیردی موسیقی
اویناییر قیز-گلین‌لر.
شن‌لیک آشیردی باشدان
او دئییب، بو گولوردو
هره اوز سئوینجینی
باشقاسی‌یلا بؤلوردو.
گئجه یاری گوپبا-گوپ
اوخویوردو آشیق‌لار
بوشالیردی قاب-قاجاق
سس‌لنیردی قاشیق‌لار.
سحر اولدو یوخوسوز
ائوینه گئتدی هامی
یوخودا چیخاجاقدی
بو شنلییین لاپ تامی.
آمما آمان صاباح‌دان
پیشیک‌لر خسته‌لندی
قوشوق‌لارین یئرینه
اوخشاما بسته‌لندی.
بیری باشینی توتدو
او بیریسی قارنینی
بیری وورهای سیلیردی
زیلیق آخان بورنونو.
او اوردا بؤیرو اوسته
تب ایچینده یانیردی
بو بوردا اینانمازجا
کوروناسین دانیردی.
سیز ده گول بالالاریم!
ییغینجاق‌دان قورونون.
الیزی آلکول‌لاییب،
آغزیزا ماسکا وورون!
[سحر خیاوی، پیشیک خانیمین خطاسی، مهد تمدن روزنامه سی، ؟ شماره سی، ۷ جی ایل،۲۰ مرداد ۱۳۹۹]
Page updated
Google Sites
Report abuse