شعر ۸۵) منیم باغیم باهاریم

میرزه علی اکبر صابیر (۱۸۶۲-۱۹۱۱) دان بیر شعر.

منیم باغیم، باهاریم

فیکری ضیالی اوغلوم

مکتب زامانی گلدی

دور ای وفالی اوغلوم

ای گؤزۆم، ای جانیم

گئت مکتبه جاوانیم

گۆن چیخدی، صبح آچیلدی

قارانلیقلار قاچیلدی

پنجره دن گۆن دوشدو

اوتاقلارا ساچیلدی

ای گؤزۆم، ای جانیم

گئت مکتبه جاوانیم

اوغول اوغول آماندیر

چوخ یوخلاماق یاماندیر

چوخ یوخلاماق شیطان دان

تئز دۇرماق آللاهداندیر

ای گؤزۆم، ای جانیم

گئت مکتبه جاوانیم

مکتبه وار شرافت

دفتر ده وار لطافت

جاری اولۇر قلم دن

شیرین شیرین حکایت

ای گؤزۆم، ای جانیم

گئت مکتبه جاوانیم

نصیحت آل، نصیحت

قیل کسب علمه غیرت

علمسیزلیک بلاسی

موشکول اولۇر حقیقت

ای گؤزۆم، ای جانیم

گئت مکتبه جاوانیم

آللاه اولسۇن سبیقین

مکتب سنین شفیقین

دۇر مکتبه گئت اوغلۇم

دفتر سنین رفیقین

ای گؤزۆم، ای جانیم

گئت مکتبه جاوانیم

علم اؤیرن امتحان وئر

اؤز فضلینی نیشان وئر

قدرین بیل علمی فضلین

علمین یولۇندا جان وئر

ای گؤزۆم، ای جانیم

گئت مکتبه جاوانیم