۴) آی تکین

آی تکین ناغیلینین آلتیمینجی صحنه سی

آی تکین ناغیلین کی هاممیز اشیتمیسیز؟ آیتکین بیر مهرابان خیردا گیزین ناغیلی دی کی بیر ظالیم اویگه ننه نین الینه توشوپ. اونین اویگه ننه سینن، اویگه باجیسی اونو چوخ اینجیدیب هر گون اونی ائوین هر ایشین گوردورورلر. بو اویگه ننه آی تکینی آرتیقراق اینجیتماخ اوچون اونا هر گون نم نکده یون وریر کی بولاری آپار ساپ ائله گتی. بو ناغیلی بو کیتاب دان گوتوروپ بوردا گتیریرم. «آی تکین، نمایشنامه کودک بر اساس افسانه های آذربایجان»، جناب شاهد مجتهدزاده اردبیلی نین کیتابی.

ناغیلین آلتیمینجی صحنه سی بوجوردی:

مئشه، گون ایشیقینان پاریلدیردی، خوروزین قوقولداماخ سسی اوزاخ دان گلیردی، آی تکین تلیس الین ده، بیر داش قیراغیندا اوتوروب جهره الینده، یون لری ساپ الیردی. یاواش یاواش سسه گلیپ بئله اوخودی:

آی تکین:

من بیر قیزام یونوم وار

تلیس دن پالتونوم وار

آداملار دورت تاییمدا

آت گزدیریب چاپیرلار

اوچی لاریم گئدیرلر

چول قوشلارین تاپیرلار

چؤل قوشی اوشدی ایتدی

اوچی سسین ائشیتدی

بیرده ن ایلدیریم شاخدی

یوخوم قاریشدی گئتتدی

بیردن بیر یئل باشلادی اسماغا. آی تکین تلیسی برکدن قوجاخلادی، آمما یل اونی آی تکینین الینن قورتاریب، اویناخلیه اویناخلیه اونی گؤیه آپاردی. گتیریب بیر ائوین پنجره سینن آتی ایچریه. آی تکین تز گدیپ او ائوین قاپیسینی دویدی.

قاری:

کیمدی او؟ کیمدی او؟

آی تکین:

منم من، آی تکین ...

قاری:

نه ایستیرسن آی بالا؟!

آی تکین:

یونوم ایتیب آی ننه...

قاری:

من نه بیلیم هاردادی؟!

آی تکین:

من مئشه ده گزیردیم، تلیس ده یون الیمده

شیرین شیرین اوخوردوم، سؤزوم قالدی دیلیم ده

بیر ده ن بیر یئل اسدی، سؤزی دیلیمده کسدی

یونی آلدی الیمدن، باجادان ائوه باسدی

قاری:

من کی گورمیه ام!!

آی تکین:

آچین قاپینی اجازه وئرین گلیم ایچه ری تاپیم.

قاری قاپی نی آشدی، بیر قورخمالی قیافه سی واریدی.

آی تکین (قورخا قورخا):

سلام قوجا ننه.

قاری:

منیم آدیم قوجا ننه دییر، قاری ننه دی.

آی تکین:

باغیشلا قاری ننه جان، منیم یونوم دوشوب سیزین ائویزه.

قاری:

سن یونی مئشه ده نینیرسن؟!

آی تکین:

سوروشما قاری ننه جان، اوزون سوز دی...

قاری:

دئنه ن قیزیم، من چوخ دان هئچ کسی نن دانیشمامیشام (آی تکین ایچه ریه گدیر)

آی تکین:

جانیم سنه عرض ایله سین قاری ننه جان، منیم بیر ننه لیگیم وار کی گؤنده منه یون وئریر گتیره م بو مئشیه... (بیراز صبر ائلییپ، اوز اللرینه باخیب، بارماخلارینان اویناخلییر)

قاری:

مئشه ده نه ایلیسن؟

آی تکین:

اوتوروب یونلاری ساپ ایلیه م ...

قاری:

سن بو خیردا بویونان، نه جور تک دانا بو قارانلیخ مئشه یه گلیرسن؟

ای تکین:

(تلیسی تاپیپ دی) دای عادت ایله میشم.

قاری:

باخیم گوروم نه قدر یونین واردی؟

آی تکین:

بویور قاری ننه. (تلیسی گورسدیر).

قاری:

ایستیرسن بو یونی من سنه ساپ ایلیه م؟

آی تکین:

قاری ننه جان سن گره ک الان استراحت ایلیه سن، سنین ایش وقتین گئچیب.

قاری:

یوخ بالا من آیری بیر یولدان بونلاری ساپ ایله رم.

آی تکین:

نه جور؟

قاری:

باخ. (بیر زات اوخوماغا باشلییر). دینقیلی میندی میندی، بونلار ساپ اولسون ایندی، هاچان قاچان پاچانی، تلیسین آغزین آچانی (تلیس دن بیر توسدی قالخیر، تلیسی آچیپ بیر بویوک ساپ کله فی اوندان چیخادیر)

آی تکین:

وااای. بو ندی؟ نه جور؟ قاری ننه جان؟؟ ساغ اول، وار اول، من سنون محبتویی نه جور جوبران ایلیه بیله رم؟

قاری:

جبران ایله مه ک ایسته مز، سن ادبلی قیزسان، فقط منیم سن نن اوچ سوالیم وار، اگر جواب وئره بیلسه ن، سنه بیر یاخچی یولدا گوسته ره جه یه م.

آی تکین:

سوروش قاری ننه سوروش...

قاری:

ده گوروم، منیم ائویم تمیزدی یا سنین ننه لیگینین ائوی؟

آی تکین:

سنین ده ائوین تمیز اولار منیم ننه لیگیمین ائوین نن ده آرتیخ.

قاری:

لاپ یاخشی، ایندی دئنه ن گوروم، منیم تاباغیم تمیزدی یا سنون ننه لیگین تاباغی؟

آی تکین:

سنین ده تاباغین تمیز اولار...

قاری:

ده گوروم، منیم باشیم تمیز دی یا ننه لیگینین باشی؟ (باشین اییپ آی تکینین گؤزلرینین قاباقینا)

آی تکین:

سنین ده باشین تمیز اولار...

قاری:

آخی نه جور؟؟

آی تکین:

اگر اجازه وئرسن من بیر آز سنه ائو ایشی گوره م هامیسی تمیز اولار...

قاری:

آللاه سنی ساخلاسین قیزیم.

آی تکین باشلادی ایشله ماغا. ائوی توز توپراخ گوتتدی. بیر آز دان سونرا توز یاتاننان سونرا ائو تمیزلشیپ، قاری ده بیر تمیز کوینک اینینده گییپ دیر.

قاری:

ساغ اول قیزیم. ایندی گوی منده عهدیمه وفا ایلیه ییم.

آی تکین:

من کی بیر ایش گؤرمه دیم، قاری ننه ایشیمی راحت ایله ییپ بو یونلاریمی ایپ ایلیه ییپ...

قاری:

(گوله گوله). سن چوخ زحمت چکدین قیزیم. ایندی قولاخ آس. منیم ائویم دن چیخاندان صونرا، قاباغوا بیر آخار چای گله جک، رنگی آغ آپاخ سوت کیمی، او سویی لان ال اؤزویی یو داهی آیری زات یوخ! صونرا بیر آیری چای دا گله جک رنگی قیپ قیرمیزی نار ره ده، اونلارنان دا دوداخلارویی یو، یایلاخ لاروآ چک صونرا گئت ائوینیزه.

آی تکین:

باش اوسته قاری ننه جان. سنون لطفویی من هئچ وقت یاددان چیخاتمارام (تلیسی گوتوروپ، ائو دن چیخا چیخا). خداحافظ....

قاری:

خداحافظ. سوزلریم یادینان چیخماسین...

آی تکین ائودن چیخیپ چایا یتیشدی.

آی تکین:

به به، اوزودی، آغ سو. گرک اوزومی یووام صونرا دا هئش زات. اودی بیر آز اویانلیخ بیر قره چای وار. بودا قره سو، گرک ساچلاریمی یووام. قاشلاریمی کیپریک لریمی صونرا دا هئش زات. بودا آخیر چای، قیرمیزی سو، بوندان دا یایلاخلاریمی دوداخلاریمی گره ک یوام.

آی تکین اوزی بیلمیه بیلمیه قاری ننه نین سوزلرینا باخارکن، گوزل لشیپ بیر آی پارچاسی تک گیز اولور. ناغیلین قالانین دا کیتاپ دان اوخویون...

[شاهد مجتهدزاده اردبیلی، آی تکین نمایشنامه ی کودک بر اساس افسانه های آذربایجان، نشر آرچا، اردبیل، ۱۳۹۸]

http://opac.nlai.ir/opac-prod/bibliographic/5805858