#احمد #بوستون

لولو و نانا (بولوم ۲)

ژیانکو اَییلیب احتیاط‌لا قورباغانی چکمه‌سیندن قوپاردی. بیر چوپله اونون اۆر‌گین آییریب اونا دقیق اولدو. دامارلارین اتصالینا باخدی. قارنینی، قارا و آغ جیگر، بئیین و بویرَکلری‌نی بیربیر آییریب اینجه‌له‌دی*. او زامانا قدر قورباغانی سادجه بیر قورولدایان، یاشیل، پؤتا و کیچیک بیر حیوان سانیردی. آنجاق آرتیق هر دفعه قورباغا قورولتوسو ائشیتدیکده، اونون ایچری اجزاسینا، بئینیندن اۆر‌گینه پیام گوندردیگینه فکرلشیردی. بئله‌لیکله ژیانکو، بیولوژیه ماراقلاندی و «شنژن» شهرین‌ده دانشگاها گئدیب بیولوژی‌ده لیسانسی‌نی بیتیردی* و سونرا آمریکادا رایس (Rice) دانشگاهین‌دا دکتراسین بیوفیزیکده آلدی و سونرا استنفورددا پست داکین گئچیرتدی. سونرا چین اۆلکه‌سینه قاییتدی و اوتوز ایل او قورباغانی آیاغی‌لا ازدیکدن سونرا بیر آی قاباق، زندان دوره‌سینی گئچیردیب آزاد اولدو. زندان؟ نه‌دن زندان؟ او قورباغایا گؤره‌می زیندانا دۆشدو؟ ژیانکونو ۳ ایل زندانا سالما سببی ندی؟ یعنی چین‌ده قضاوت سیستمی ۳۰ ایل‌دن سونرا او یازیق قورباغانین عائله‌سینین شکایتینه یئتیشیب؟‌ بلکه ده اؤتوز ایل چکیب قورباغالارین قورولتو دیلینی چین دیلینه چئویرلر و سونرا باشا دۆشوبلر کی ژیانکو نه بؤیوک بیر جنایت ائلییب. خئیر. بونلار دئییل. ژیانکونین زندانا دۆشمه‌سی‌نین باشقا بیر دلیلی وار. او بیر قاپینی آچیبدیر کی دونیانین آراشدیرماجیلاری* و بیلگین‌لری* ، اوْتوز-قیرخ ایلدی او قاپینی آچماغا جرات ائتمه‌ییبلر. البته بیر گیزلی قاپیدان سؤز گئتمیر، بلکه بو قاپی ایللردی تانینمیشدی آنجاق آرخاسینداکی* قورخونج دئوی اویاتماغی کیمسه جرات ائتمیر. معمولی بیر دانشمند اولساز، او دئوی اویاتماقدان چکینرسیز نیه کی بو قاپی بیر علم‌دیر کی اوندا مین جاوابسیز سوْروسو* وار. البته کی ژیانکو بیر معمولی دانشمند دئییلدی.

سؤزلوک: اینجلمک: بررسی ائتمک – بیتیرمک: تمام ائتمک- آراشدیرماق: تحقیق ائتمک، to research – بیلگین: دانشمند – آرخا: دال، behind – سوْرو: سوْرغو، سوال

عکس: دکتر ژیانکو