ناغیل ۲۱) دؤشان ناغیلی

اوشاقلار! بئله دئيیرلر کي بير دفعه دووشان بير قويونا راست گليب ، دوست اولوب عومور بويي بير- بيرلریندن آيريلمامايا و هميشه ليک دوست اولماق ايستيرلر.اونا گوره ده قويون دووشانا ديیه ر کي ايندي کي بيز دوست اولموشوق گل بير ائو تيکيب اوردا ياشاياق. دووشاندا قبول ائله ييب قرار اولور صاباحیسي گوندن اودون ييغيب بير ائو تيکسينلر.

صاباح يولا دوشوب ايکي يولداش مئشه ده تخته – تاباق تاپماقا گئتديلر. يولدا ائنلي – قالين بير آغاجا راست گليب قويون دئيیر کي :

من بو آغاجي کوکوندن يئره يخيب ، يئره ساللام!

دووشان دا دئيیر: قيرا بيلمه زسن!

قويون دالي- دالي گئديب ، کلله سيله آغاجا يوگوروب آغاجي کوکوندن تاپپيلتيله يئره سالير.

دووشان اوز- اوزونه دئيیر:بالام آغاج سينديرماق نه راحات ايشيميش ! منده دوستوما اوزومي گؤرستمه ک اوچون اونون يانينداکي آغاجي سينديرام و دئيیر:

قويون قارداش باخ ايندي من ده بو آغاجي سينديراجاقام!

يولداشي قويون ايستير دئسين ؛ بو ايشي گورمه ؛ بيردن- بيره دووشان دال- دالي گئديب بيردن آغاجين اوستونه يوگورور، اوندان سونرا دووشانين باشي مؤحکم آغاجا ده يب بوينو گيرير قينينا!قويون دوستونا کؤمک ائتمه ک اوچون دووشانين يانينا گئديب ياپيشير دووشانين قولاقلاريندان و چکمگه باشلاير. اما نه قده ر گوج وئرير دووشانين بوينو قينيندان چيخمایير ؛ عوضينده دووشانين قولاقلاري اوزانير؛ او گون بو گوندور کي دووشانلارين قولاقلاري اوزون قاليبدیر.

[ساقی آذربایجان روزنامه سی، خبر کدی: ۱۲۵۱۹، آبان آیینین ۱۸ جی، ۱۴۰۰]