لالالایی ۴۹) تاتان تاتان

خانم زینب تدین نن بیر گؤزل شعر. اوز شخصی اسنتاگرام پئجین نن گؤتورموشم.

تاتان تاتان تاتیلی تاتان

آستا-آستا، آتدیم آتان

گول ایچینده،گولوم یاتان

ناز قیزیما قربان اولوم

بئش داش اوینویان اللری

تورکو دانیشان دیللری

تئلینده دوزمه گوللری

ناز قیزیما قربان اولوم

دینگی پیستان،قوناق-باجی

اویونلاریندی سر تاجی

توتمویان داشلار اووجو

ناز قیزیما قربان اولوم

کئش تاخیبان اینجه بئله

آتدیلان او اله‌‌ بو اله

شنلیگی پای وئرن،ائله

ناز قیزیما قربان اولوم

آی منیم گوللو لچه کلی

لب لری لاله چیچه کلی

اوجا آرزیلی، دیلکلی

ناز قیزما قربان اولوم

شیرین_شیرین دیل آچانا

اورکلره یول آچانا

ائویمیزه نور ساچانا

ناز قیزبما قربان اولوم

منیم‌ قیزیم تورکون قیزی

گؤیلرین پارلاق اولدوزو

قارا گؤز-آی کیمی اوزو

ناز قیزیما قربان اولوم

«تدین»ون بیرداناسی

بادام ایچی،نار داناسی

زولفلو گئجه نین قاراسی

ناز قیزیما قربان اولوم