Embedded Files
یوخلارکن نورونلارین آراسیندا آشاغی فرکانس‌لی بیر ریتملر بئیینده سؤرمگه باشلاییرلار. بۇ ریتملر آلفا (Alpha) و یا تئتا (Theta) فرکانسلارین‌دا اولدوغونا گؤره بیر ساعاتین عقربه‌لرینین تیک-تا‌کینا یا بیر مترونومین* سالینماغینا* بنزیر. بو ریتملر، نورونلارین آراسیندا اولان باغلانتی‌‌نی منظم ائدیب اونو قالارغی ائتمه‌یه یاردیم‌جی اولور. قاییدالیم کویر مثالینا. نئجه سؤپورگه ایله بیر یئری سؤپورنده اؤنو دال‌قاباق ائله‌مک‌له، بیر ریتم یارالدیب و یئرده‌کی تؤز تورپاغی کنارا آتارلار، آلفا ریتم‌لری‌ده بئیینده، بیر سؤپؤرگه کیمی، نؤرون‌لارین آراسینداکی باغلانتی‌لارین دوامینا یاردیم ائدر. ائله‌بیل کویرده بیر قۇم فیرتاناسیندان سونرا، داشجیق‌لاردان قۇرولان تپه‌لرینین آراسینداکی قۇم‌لاری بیر سؤپورگه‌نی دال‌قاباق ائله‌مک‌له آریتلاییب تپه‌لری داها دواملی ائدک. آنجاق کؤرپه‌نین بئیینی بۇ آشاغی فرکانس‌دا اولان ریتمی یاراتماغی‌نی باجارمیر و ائله بو سبب‌دن اوشاق یوخویا دۆشمک اۆچۇن باشقا‌سی‌نین یاردیمینا احتیاجی اولور. اصلینده اۇشاغی آرام‌لادان تاکتیک‌لرین هامیسی، ایستر آنانین لای‌لایی و یا بئشیگین ییرغالاماغی، بو ریتمی اۇشاغین بئینین‌ده یاراتماق اۆچوندور.
بۇ ریتملره دۆشونرکن، اۆز اۆزومه فکرلشیردیم کی انسان ائله هر قوْنودا اؤیرنمک ایسته‌سه، باشقا چاره‌‌سی یوخدور. ایلک دۆشۆنجه‌لرینده بیر طوفان یاراتمالی‌دیر. بۇ طوفان عاغلیندا اولان هرنه کؤکسوز و بینؤره‌سیز اینانج‌لاری ییخیب داغیتدیقدان سونرا، انسان گئری قاییدیب ساغ قالان فیکیرلرینی توپلاییب اونلاردان یاپیشمالیدی. بو حالدا اوغلومو یانیمداکی بئشیگین‌ده یاتیردیب آذربایجانین یازار و آوانگارد تنقیدچیسی جعفر بزرگ‌امین‌نین لایوینا قاتیلدیم. لایو چوخ اوزونا چکدی. سؤز چاغداش تورکجه شاعیرلردن گئدیردی. بزرگ‌امین اولدوقجا دیوان شعرینی اَلَشدیردی*. دوغرودان دا طوفان کیمی هئش کیمسه‌نی ساغ بوراخمادی. عروض وزنی‌نین تورکجه شعره اویغون اولمادیغینی و هجایی وزن‌ده سربست شعر یازیلماسینی وورغولادی. آغیر قیلینج‌لا هر نه اؤرک باغلامیشدیم ییخیب داغیتدی. دۆرت-بئش ساعات لایودان سونرا لایودا اولانلار هره‌سی بیر طرفه یورغون دۇشوب، بۇتون اینانجلاریم چؤکوب فقط بیر نئچه‌سی‌نین سینیق‌لاری بۇیان‌اۇیانا داغیلیب، یاری‌جان قالمیشدیلار.خوشبختانه، او حالدا، باریش آدلی بیر شاعر لایوا قوناق گلیب غزللریندن بیرین اوخودو. بیر آشیق علی آدلی‌‌دا لایوا قوشولدو. آشیق علی‌دن باکی هاواسی بیر نغمه ایسته‌دیلر. آشیق سازین اله آلیب او هاوادا سازین دینگیلدتدی. او غزل و آشیقین سازینین ناله‌سی هامیمیزی دۇیغولاندیردی*. آشیقین زخمه‌سی سازا دَیَرکن، نئچه یوز ایل اصالت سازدان چیچکله‌نیب جانلاریمیزی نیسگیله بۆرودو.
او حال دا، آیاغیم هدفونون سیمینه ایلیشیب اونو چکیب چیخارتدی. آشیغین نغمه‌سی ائوین فضاسین‌دا داغیلدی. اوغلوم بئشیکده سسه دوغرو اۆزونو چئویریب بیر نئچه ثانیه آچیق آغیزلا سازی دینله‌دی*. آنجاق نغمه‌نین آغیر و کدرلی اولدوغونا گؤره بیردن تۇموب آغیز بورنونو بۇزوب آغلامسیلاندی. تئز هدفونو اؤز یئرینه قایتاردیم و اؤز اؤزومه دئدیم اوغول بۇ یۆک هله سنه چوخ آغیردی. هله سن هئچ، سنین بابان‌دا بو لایودان سونرا بۇ آغیرلیق‌دا یۇکو چاتماغا جانی قالماییب. سن هله لیک بئیبی شارکا (Baby Shark) قولاق آس، بیزده گؤرک بۇ ایش بیزی هارا چاتدیراجاق.
سؤزلوک: مترونوم: موسیقی ده تمرین اۆچۆن ثابیت بیر ریتم یاراتماغا بیر وسیله، سالینما: نوسان، اوسیلاسیون – الشدیرمک: نقد ائتمک – دویغو: احساس – دینله‌مک: قولاق آسماق - بئیبی شارک: انگلیسجه معروف اوشاق ماهنی‌سی
@YengiDunyadan|یئنگی دنیادان آذربایجانا سوْوقات
Page updated
Google Sites
Report abuse