Embedded Files
بئش آیلیق کؤرپهنی، یاتیرتماق اۆچون اؤز باشینا بۇراخماق گرکلیدیر. آنادان دوغولاندان بَری، آناسینین ایستی و یۇموشاق قۇجاغینا و لایلاسینا آلیشان* کؤرپه، بئش-آلتی آیلیق اولدوقدان سونرا، اؤزو اؤزونو اوْغوندورماق و آناسینین قۇجاغیندان آیریلماغی اؤیرنمهلیدیر. سؤزسۆزکی، اۇشاق بۇنو خوشلاماییب آغلاماغا باشلایاجاق و آناسینین قوجاغینا قاییتماغا چالیشاجاق. البته بۇ قایدا یالنیز اۇشاقلارا گؤره دئییل؛ بؤیوکلرده بئلهدی. اینسانی ائله اؤز باشینا یالنیز* و آماجسیز بۇراخسان عاغلی چاشاجاق و ایچیندکی تشویشلر اونو پوزاجاق. اینسان بالاسی اؤزونو اوغۇرتماغی بیردن اویرَنمیر. اؤزو اؤزونو اؤغۇرتماق و اؤزباشینا یۇخلاماق باجاریغی کؤرپهده آنا و یا آتا طریقیله بیر نئچه هفته ایچینده یارانمالیدیر. بۇ تدریجی اؤیرنمه سۆرجین* آرخاسیندا علوم اعصابدان تانینمیش بیر اصل واردیر.
اینسانین بئینیندهکی سیستملر چیچیک اوشاقلاردا هله کامیللشمهییب. اۇشاقلار اؤزباشینا یاتماق باجاریغین* زامان بویونجا آتا-آنادان منیمسهییر، یاخود داها دوغرۇسو، اؤز بئیینلرینه اؤیرهدیللر. بۇ نئچه هفته چوخ اؤنملیدی* نیه کی بۇ سۆرهده کؤرپه اۇشاق بیر معیّن ریتم ایله اؤزونو دۇرغونلاتماق* و تشویشه غلبه ائتمگی بئینینه اؤیرهدیر. بۇ تشویش البته اینسان بئینینین ذاتی بیر اؤزللیگیدیر*. عادی حالدا بئینیمیزدکی نۇرونلارین* (Neuron) آراسیندا گئچن دانیشیق قایداسیز و قارماقاریشیق گؤرونور. آمما او تشویش و نظره گلن جیغان ویغان نورونلارین دانیشیغی، اصلینده بئینین ان اؤنملی یئتَنکلرینین* بیریدی، نیه کی بیر رندوم قۇرولوشدا هر تۆر یاپینی* تاپماق اولار. بئینین اؤیرنمه سیستمی کویرده قۇم فیرتیناسیندان سونرا یئرده قالان کیچیک داشجیقلارین بؤیویوب بیر معظم تپه اولماسینا بنزیر. نورونلارین آراسیندا قالارغی باغلانتی یاراتماق اوچون بیر ایشی تکرارلاماق لازیمدیر. هر بیر قۇم فیرتیناسیندان سونرا، کویردهکی داشجیقلارین اوجالماسینا تای، بیر ایشی تکرارلاماق، بیر نئچه نورونون دانیشیغین راحاتلادیب اونلارین آراسیندا بیر گۆجلو باغلانتینین قۇرولماسینا یول آچاجاق. ایشین تکراری چوخالدیقدا، اؤ نئچه سئچیلمیش نورون لار بیرلیکده اؤز آرالاریندا دانیشماغا باشلایاجاقلار. بۇ آرادا یالنیز تکرار یوخ، بلکه باشقا فاکتورلاردا بو باغلانتینین یارانماسیندا رول اویناییر کی یۇخو بو فاکتورلارین اَناؤنملیسیدی.
آردی وار...
سؤزلوک: دۇرغونلوق: سکون، آرامش – آلیشماق: عادت ائتمک – یالنیز: فقط – سۆرج: پروسه، فرایند – باجاریق: مهارت – اؤنملی:مهم – اؤزللیک: خصوصیت، مشخصه – نورون:بئییندهکی عصب سلوللار. بئینین اَنکیچیک پردازش واحدلری - یئتنک: استعداد، قابلیت – یاپی: ساختار
@YengiDunyadan|یئنگی دنیادان آذربایجانا سوْوقات
Page updated
Google Sites
Report abuse