شعر ۹۸) یئددی رنگلی مونجوق

آقای زاهید خلیل دن بیر شعر.

یئددی رنگلی مۇنجۇق

گۆنش:

آغلاما، بؤجک،

بیر دانیش گؤرک،

نه اوْلۇب آخی؟

یاشیل گؤزۆندن

نیه یاش آخیر؟

بؤجک:

ایتیردیم گؤی چمنده

آنامین مۇنجۇغۇنۇ.

هله باتما، آی گۆنش

آختاریب تاپیم اوْنۇ

گۆنش:

آخی باتماق وقتیدیر

من دایانا بیلمیرم.

بۇ گۆن لاپ یوْرۇلمۇشام

داها یانا بیلمیرم.

بؤجک:

باتما، بیرجه ساعات دا

گل، بۇراخما تک منی.

اوْ مۇنجۇغی تاپماسام

آنام دوْیه جک منی.

نه یامان قیزارمیسان،

قان تؤکۆلۆر اۆزۆن دن؟!

گۆنش:

گؤرۆرسن، آخشام دۆشۆر

گئتمه لیم داها من.

کَس تئلیمین اۇجۇندان

پالتار گئیین تاجیمدان.

سنده پارلاق اوْلارسان

گئجه ایشیق سالارسان.

بیر آزدان گۆنش باتدی.

داغین دالیندا یاتدی.

آپاریجی:

گۆنشین شۆعاسیندان

پالتار گئییندی بؤجک.

ائله کی آخشام دۆشدۆ

ایشیلدادی چیراق تک.

اۇچدۇ چمنه داغا،

باشلادی آختارماغا.

یۇمرۇ، قشنگ مۇنجۇغۇ

اوْ یئددی رنگ مۇنجۇغۇ.

بیردن اوْنۇن گؤزۆنه

غفیلدن دۆشدۆ ایشیق.

دئدی: بالام، دئیه سن

لاپ دؤیۆنجا یاتمیشیق؟!

ائله بیلدی سَحَر دی

ایسته دی دۇرا یئردن.

قۇلاغینین دیبینده

کیمسه قیشقیردی بیردن:

تاپمیشام، من تاپمیشام

قیرمیزی رنگ مۇنجۇغۇ!

قارا خاللی مۇنجۇغۇ!

اوْ یئددی رنگ مۇنجۇغۇ!

سئویندی آتَشبؤجک

سیلکه لندی گۆل، چیچک!

[اوشاقلارین یاخین دوستو(مئتودیک مکتوب)، شاعر زاهید خلیلین آنادان اولماسینین ۷۰ ایللیک یوبیلئیی مناسبتیله، ف کؤچرلی آدینا رئسپوبلیکا اوشاق کیتابخاناسی، باکی ۲۰۱۲، ص ۱۳]