ناغیل ۱۴) تنبل احمد

ناغیلی بو کیتاب دا گوروپ بوردا گتیرمیشم. محبت داستان لاری (آذربایجان افسانه لری)، آقای عبدالکریم منظوری خامنه.

بیری وارایمیش، بیری یوخیمیش، احمد آدلی بیر تنبل وارایمیش. تنبل لیک دن ال اوزونو یوماز، حاماما گئتمز، هئچ اودن چیخمازمیش. آروادی ایش له رمیش، او دایئییب، یاتارمیش.

گون لرین بیر گونی احمد گیلین قونشالارینا میمون اوینادان گلدی. تنبل احد ائوده اوتورا بیلمه دی. چیخدی کی میمون اویونونا تاماشا ائله سین. باخدی باخدی، بیرده خبر توتدی کی، یئمه گین وقتی دیز. تئز ائوه قایتدی. گؤردو قاپی باغلی دیر. نه قدر اینه له دی آچیلمادی. آخیری آروادی پنجره دن بیر خورجین آتیب دئدی:

-ایندی یه کیمی من ایشله دیم، سن یئدین. بوندان سونرا گئت، سن قازان، من یئییم.

احمد گؤردو کی آرواد داها جانا گلیب، اونو ائوه بوراخمایاجاق، علاجسیز قالیب خورجونو قالدیردی، آچیب گؤردو بیر آز اون، یومورتا، بیردنه ده جووالدوز وار.

احمد خورجونینی چیگینه سالدی، یول گئتمه گه باشلادی. آز گئتدی، اوز گئتدی. دره تپه دوز گئتدی، گلیب بیر خارابالیغا چاتدی یوخوسو گلدی، خورجونو باشی نین آلتینا قویوب، خور ها خور دوز یئتدی یوخو آلدی. بیر ده اویانیب گؤردی کی چیرک لی اوز گؤزونه خئلی میلچک داراشیب، باشلادی میلچک لری قیرماغا. قیردی قیردی، دؤز قیرخ میلچک اؤلدوردی. احمد اؤلموش میلچک لره باخیب گولدو، اؤز اؤزونه دئدی:

-من کی یئکه پهلوانیمیشم، نییه بو وقته کیمی ائوده اوتوروب قالمیشام؟

ائله اوردان بیر باش دمیرچی نین یانینا گئتدی، اونا بیر پاپاق قاییرتدیدری، اوستونه ده بئله یازدیردی:

-بیر شاپالاغا قیرخ اژدها اولدورن احمد پهلوان منم

احمد پاپاغی قویدو باشینا، چوخ گئتدی، آز دایاندی، آز گئتدی چوخ دایاندی، داغلار آشدی، چایلار گئچدی، دوز گلیب بیر باغا یئتیشدی. احمد پهلوان یامان یورولموشدو، خورجونو یينه باشی نین آلتینا قویدو. سن دئمه بورا یئتدی قارداش دئولرین باغی ایمیش. اونلارین قورخوسوندان بو باغا انسان ایاغی دگمه زمیش.

بیر از گئچدی، گؤی گورولدادی، ایلدیریم چاخدی یئددی قارداش دئوین کیچیگی گویدن یئره دوشدو، احمده یاخینلاشدی. گؤردو کی، بیر کیشی دیر، باشیندا دمیر پاپاق اوستونده ده یازی. تعجب ائله دی. اؤز اؤزونه دئدی: گؤره سن بو نئجه پهلواندیر کی، قیرخ اژدهانی بیر شاپالاغا اؤلدورور؟

احمد ایاغا قالخدی

[عبدالکریم منظوری خامنه، محبت داستانلاری (آذربایجان افسانه لری)، موسسه نشر یاران، تبریز ۱۳۶۹]