اویون ۲) ال اله دویمه دله

بو اویونی کیچیه بیر اوشاغ اولاندا چوخلی اوینییب خوش گچیردردوخ. من بو اویونی اینترنت ده آختاریپ نچه یردن متفاوت ورژن لرین تاپدیم. آیریلاری زحمت کچیپ بونلاری یازیپ لار و منیم ایشیم دگیل. من بوردا فقط کپی الیمیشم. دسترسیم یوخدی اصلی یازیچی لارا. اگر بیر زمان بو متنی گورسه لر و راضی اولماسالا بوردا اونو پایلاشماغینا خبر ورسین له. یا ادیت الیپ ویا دا گوتوروررم.

بیر جناب بهرام اسدی نین کیتابین دا«ال اله دویمه دله» بو اویونی توصیف الیپلر. بیرده بیر خبری صفحه سینده بیر آیری ورژنی واریدی کی سرکار خانم سوسن نواده رضی اونو یازمیشدی. متنین آخیرین ده لینک لرین گویورام.

اول ورژن :

ال-اله

دویمه دله

بیز گیدیریک بابام گیله

بابام بیر جوت باشماق آلیب

بیر تایی سنین

بیر تایی منیم

بامبالاپیس.

ایکی یئدی-سکگیز یاشیندا اولان اوشاق، تز یئریمگه باشلایان اوشاغین ایکی الیندن یاپیشیپ اونو یئریدرلر و یئریدیکجه بو سوزلری اوخویالار. سؤز، بامبالاپیس سؤزونه چاتاندا ایکی اوشاق دا اولارا باخیب گوله -گوله یئره اوتورار. بیر آز گولندن سونرا حرکت یئنیدن باشلانار. بئله لیکله اوشاقلار اگلنجه لی بیر اویون کئچیررلر. عین حالدا هله یئریشه آلیشمایان بالاجا اوشاق هر یئره اوتوراندا دینجلمک فرصتی تاپار. [بهرام اسدی، ال اله دویمه دله، ص ۷، انتشارات یاز]

ایکیمینجی ورژن:

بو اویون لاپ کیچیک اوشاقلار اوچون ایدی. آلتی- یئددی یاشا کیمی. اوغلانلی قیزلی ال- اله وئریب دؤوره فیرلانیب دئیه‌ردیلر:

-ال اله

دویمه ده‌له

بابام گئدیب باشماق آلا

بیر تای سنه

بیر تای منه

پیسسسس

پیس دئیه‌نده هامی یئره اوتوراردی. یئره اوتورمایان جرگه‌دن چیخاردی. یئنه ده قالخیب باشدان باشلاردیلار.

بعضن ده اوشاقلار بولاری اوخویاردیلار دؤره فیرلاناندا:

حاجیه گیردی باجیه

یوموتدادی قویدی تاخچیه

ریضا ریضا میندی خوروزا

بیر تپیح ویردوم دوشدو حووضا

ننه‌سی دئدی هانی بو ریضا

دده‌سی دئدی دوشدو حووضا...

روقیه

قرقره

گئت قاپینی حلقه‌له

مامان گئدیب دردره

اوشاق دوشوبب تندیره

گؤتی یاپیشیب منقله

گئتدیم حاماما لیفله‌ندیم

چیخدیم ائشییه کوفله‌ندیم

حامامچی منه چای گتی

من بو چایی ایشمه‌رم،

دروازادان کئشمه‌رم،

دروازا منیم اولسون،

قیرمیزی دونوم اولسون،

گئییم کئدیم تهرانا

تهراندا تویوم اولسون

قیزلار گلسین تویوما

قوربان کسسین بویوما.

یا دا اوشاقلارین بیریسینی چؤمبه‌لدیب اوتورداردیلار آرادا و دؤوره‌سینه فیرلاناراق اونون آدینا بئله اوخویاردیلار:

اکرمین ماماسی شکرپنیر پیشیریب

فیندیخچاسی بو بویدا

گنه‌شلیغی بو بویدا

قالخ ایاغا قاااالخ

مطلبیوه بااااخ.

بونو اوخویورکن ده بامباچایلا یاواشجا چالاردیلار اوتوران اوشاغین باشیندان یا چیینیندان. [سوسن نواده رضی، آساخبر وئب سایتی، آذر ۱۳۹۹، شناسه خبر:۳۱۲۲۷۱ لینک اشاغیدا]