شعر ۱۴) اینجیتمه یک آغاجلاری

بو شعری بو کیتاب دا گؤردوم و بوردا گتیریرم. ال اله دویمه دله، اوشاق شعرلری، آقای بهرام اسدی.

آغاجلار

اینجیتمه یک آغاجلاری

گئدک آغاجلارا ساری

اینجیتمه یک آغاجلاری

اولماسا قیزیل قانی

واردیر آغاجین جانی

قابیقلارینی سویمایاق

اوستونه تامغا قویمایاق

اولماسا دا آغاجدا سس

یارپاق ایله آلیر نفس

نفس یولوسون توتمایاق

دیبینه سم بوشالتمایاق

اولماسا دا آغیزلاری

یئردن آلیرلار زوماری

یارپاغیندا قیدا وئریر

بیزه تمیز هاوا وئریر

میوه لرینده بول دور او

هاوامیزی دورولدور او

وار اونون دا عایله سی

یاشاماغا چوخ هوسی

قیرمایاق قول-بوداغینی

قاناتمایاق دوداغینی

هئچ زامان آخماسین قانی

واردیر آغاجلارین جانی.

بهرام اسدی

۸۹/۳/۸

[بهرام اسدی، ال اله دویمه دله (اوشاق شعرلری)، انتشارات یاز، ارومیه، ۱۳۹۰]